底氣

近日很多朋友問：「自己那方做嘢甩漏咗，且事情變成：一、係人都知；二、大家都覺得甩漏位很礙眼；然後自己出嚟講：『我哋好成功，大家應該有番啲底氣，唔好執著（我哋）啲瑕疵。』究竟呢啲關『底氣』乜事？」

眾友議論紛紛，因實在跟普羅大眾認知甚麼是「底氣」，頗有出入。打個比喻，如果下屬做事甩漏，上司指出甩漏處，下屬跟住講：「老細，我覺得我做得好好喎，做咩掛住睇我啲甩漏嘢啫?!做人要有啲底氣吖嘛，睇大嘢，唔好掛住執人哋啲錯漏……」若我是老細，會如何看這件事？首先，這番話反映說話者好幾個邏輯問題：

一、件事成功/做得好與否，老細未講，你就自己先講？大家對成功的定義不相同，有人覺得成功是自製誇啦啦效果，但從老細角度，定義成功或是：你有否將件事發揮到它應有的最大效用。自己覺得勁，只是主觀感覺，上頭未必如此看。

二、叫人唔好執著或拘泥於己方瑕疵或甩漏，即叫人「隻眼開隻眼閉」，與「底氣」無關。

三、現在是老細第一個指出你的瑕疵和甩漏，嘩，那是否意指老細無底氣？怪佢睇到閣下甩漏處？

四、如我是上司，肯定會糾正這位下屬的邏輯謬誤：「小事都做到如此甩漏，如何交託大事？還在我面前講甚麼底氣？」

五、底氣不等如「隻眼開隻眼閉」，首先定義要搞清。「底氣」，根據《人民日報》一篇文章的解讀，是「做好一件事的信心、條件和力量」，有這樣深厚的基礎，才能具備自信的底氣。那「做好一件事的條件和力量」是甚麼？就是連細微處和細節位都認真對待，做到不甩漏、不遺忘、不馬虎，這就是做好一件事的起碼條件，能具備這個條件才能培養出底氣。

又，一個人真的有底氣，就不會怕別人指正其瑕疵吧？大家都想件事精益求精，若這麼小的指正聲音都不能容忍，那即是說，己方底氣都一般般喎。當己方「底氣」未見的情況下，倒頭來直指別人無底氣，實屬嘥氣。