煩到叫救命

認識卻不熟的人，突然熱情聯絡，煩不堪言，而我不怕人惡，卻至怕人煩，一看就知唔慌好嘢，給我估中，原來轉了做銷售。

明白現在搵食艱難，中年才轉工，必有其難處，但一單還一單，你有難處不代表可肆無忌憚地煩人。不知道何解，明明未轉行前好哋哋，一變成銷售後，就忽然連甚麼叫分寸和適可而止都不懂，次次一大段一輪嘴問有乜可以幫到你（以後唔好煩就真係幫到），次次打開WhatsApp，一大段一大段的，每段有六個理由游說你要做好未來計劃，煩到叫救命。

老實說，人到中年，必定已為未來做好打算，非常well-covered，不用擔心或關心。以為對方肯收手了吧?!又來一大段水蛇春咁長的「關心」：「縱然你已經有規劃……但我們開始接近退休年齡，人總要開始盤算下……如何靈活分配財富……不如我約你見個面一齊brainstorm吓吖」。Brainstorm？差點笑了出來，同我brainstorm？其實咪又係等於狂sell呢樣嗰樣。若我這個年紀還仍未為退休作好準備，就認真該煨了。

實在頂唔順這種三日唔埋chur你一次的煩擾，所以忍無可忍，最終還是要直接拒絕——乜規劃都無興趣，不用brainstorm。不見得銷售要這樣chur和hardsell，煩不堪言、惹人討厭，乃職場禁忌，必戒。我的退休保障是跟誰買的？就是從來沒有跟我sell過任何產品的業界朋友。不煩厭就不討人厭，真正朋友是不會煩朋友的，這反而令我當年主動找對方購買。