Maamulka Trump ayaa dib usoo celinaya app ku shaqeeya moobilka – oo markiisii hore loo sameeyay inuu gacan ka geysto ballamaha dadka magangalyo doonka ah – haatanna wuxuu maamulku u adeegsanayaa in muhaajiriinta aan diwaan-gashaneyn ee Mareykanka ku sugan ay “iskood isku tarxiilaan”.
App-ka, oo loo yaqaanno CBP Home, ayaa u oggolaanaya muhaajiriinta inay soo gudbistaan codsi ah “inay doonayaan inay isaga tagaan dalkaas”, taas oo waaxda ilaalada xadka Mareykanka ay sheegeen inay fursad u siineyso inay iska tagaan iyagoo aan la kulmin “cawaaqib xumo daran”.
Saraakiisha Mareykanka ayaa dhowr jeer ku celiyay in muhaajiriinta aan diwaan-gashaneyn ee dalka ay isaga tagaan si iskood ah, beddelkii la xiri lahaa oo la tarxiili lahaa.
Tan waa tallaabadii ugu dambeysay ee dadaallada Aqalka Cad uu ku doonayo inuu isbeddel ku sameeyo hannaanka socdaalka Mareykanka, oo uu ku daray ballamo ku saabsan xirxirid ballaaran.
App-kan oo markii la daah furayay sanadii 2020 la oran jiray CBP One, waxaa la ballaariyay xilligii maamulka Biden si muhaajiriinta loogu oggolaado inay tagaan goobaha laga soo galo dalkaas.
Xilligaas, saraakiisha ayaa app-kan u arkayay inuu gacan ka geysanayo xirxiridda muhaajiriinta ee ka dhacda xadka waxayna usoo bandhigeen sida inuu qeyb ka yahay dadaal ballaaran oo lagu dhowrayo magangalyo doonka aalaaba soo gala safarro halis ah.
Hadda, codsiga cusub ee la cusbooneysiiyay, ayay muhaajiriintu isku sheegayaan isla markaana caddeynayaan rabitaankooda inay dalka ka baxaan.
Bayaan ay soo saartay, ayay Xoghayaha Amniga Gudaha Kristi Noem ku sheegtay in iyagoo iskood isku musaafurinaya oo adeegsanaya app-ka, muhaajiriinta “laga yaabo inay wali fursad u helaan inay si sharci ah ku soo noqdaan mustaqbalka oo ay ku noolaadaan riyada Mareykanka”.
“Haddii aysan sameyn, waan soo heli doonnaa, waanu tarxiili doonnaa, mana soo laaban doonaan weligood,” ayay raacisay.
App-ka ayaa sidoo kale waydiinaya muhaajiriinta haddii ay haystaan ”lacag ku filan oo ay kaga baxaan Maraykanka” iyo haddii ay haystaan ”baasaboor sax ah oo aan dhicin oo waddankaagii asalka ahaa ee dhalashada ah”.
BBC waxay la xiriirtay DHS si ay u hesho faahfaahin dheeraad ah oo ku saabsan sida nidaamku u shaqeeyo marka foomamka app-ka la buuxinayo.
CBP Home waxaa kale oo loo isticmaali karaa in lagu dalbado oo lagu bixiyo I-94 gelitaan ah iyo ka bixista ilaa toddoba maalmood ka hor safarka.
Sida laga soo xigtay DHS, app-ka waxaa loola jeedaa in lagu dhamaystiro $200m (£155m) olole gudaha iyo dibadda ah oo loogu baaqayo muhaajiriinta aan sharciyeysnayn inay “bannaanka joogaan oo ay hadda baxaan”.
Maamulka Trump wuxuu si degdeg ah ugu dhaqaaqay inuu meesha ka saaro ‘CBP One app’ taasoo qayb ka ah isbeddelka weyn ee istiraatiijiyadda socdaalka. Waxa kale oo uu hakiyay barnaamijyadii cafiska, waxaana sare u kacay ugaarsiga ballaaran ee muhaajiriinta.
Dabayaaqadii bishii Febraayo, maamulku waxa uu sheegay in uu samayn doono diiwaan qaran oo loogu talagalay muhaajiriinta aan sharciyeysnayn iyadoo kuwa ku guul daraystay in ay isdiiwaangeliyaan ay suurtogal tahay in ay wajihi karaan dacwad dembiyeed.
Diiwaangelintu waxay uga baahan tahay soo-galootiga aan sharciga lahayn ee ka weyn da’da 14 inay siiyaan dawladda Maraykanka ciwaankooda iyo farahooda.
Khubarrada ayaa sheegay in nidaamka diiwaangelinta uu caqabado la kulmi doono, maaddaama ay adag tahay in la dhaqan geliyo, isla markaana ay ka jiraan caqabado dhinaca farsamada ah.
